Навіны і аб’явы
3 чэрвеня 2023 года Апостальскі Нунцый арцыбіскуп Антэ Ёзіч наведаў дзяцей нашай парафіі, якія адпачывалі на Канікулах з Богам у Навагрудку. Дзеці з радасцю і спевам прывіталі шаноўнага госця і засыпалі шматлікімі пытаннямі. Сустрэча атрымалася вельмі цёплай, радаснай і цікавай.
Шчыра дзякуем вам за супольную малітву, за прыбіранне капліцы, за складзеныя ахвяраванні, за ахвяраванні на будову касцёла і за ўсялякую аказаную дапамогу. Няхай Добры Бог узнагародзіць вашую шчодрасць і дабрыню. На гэтым тыдні ў літургіі адзначаем: 5 чэрвеня (панядзелак) - Успамін св. Баніфацыя, біскупа і мучаніка. Нарадзіўся каля 674 г. у Вэсэксе (Англія). Быў выхаванцам бэнэдыктынцаў. Праз пэўны час Баніфацый сам уступіў у ордэн бэнэдыктынцаў і ўзначаліў адну з манаскіх школаў. Ва ўзросце 40 гадоў пачаў займацца навуковай дзейнасцю, складаючы першую пісьмовую ангельскую граматыку. У 718 г. Папа Грыгорый ІІ скіраваў Баніфацыя з евангелізацыйнай місіяй у паганскую ў тыя часы Цюрынгію. Некалькі гадоў Баніфацый паспяхова працаваў па ўсёй Германіі, абвяшчаючы Божае слова і засноўваючы дыяцэзіі. Усяго на нямецкіх землях ён заснаваў 7 дыяцэзій. У 722 г. Баніфацый быў кансэкраваны як біскуп-місіянер, а праз 10 гадоў стаў арцыбіскупам і папскім вікарыем у Германіі. 5 чэрвеня 754 г. падчас аднаго з місіянерскіх падарожжаў на тэрыторыі Нідэрландаў Баніфацый разам з 52 паплечнікамі быў забіты паганамі. Сваёй дзейнасцю святы Баніфацый заклаў падмурак еднасці хрысціянскай Еўропы, і таму яго называюць «апосталам Германіі» і «заснавальнікам Захаду і Еўропы». Да рэліквій святога, якія спачываюць у заснаваным ім кляштары ў Фулдзе, на працягу стагоддзяў прыходзілі і працягваюць прыходзіць шматлікія пілігрымы. Баніфацый з’яўляецца апекуном краўцоў і півавараў. 8 чэрвеня (чацвер) – УРАЧЫСТАСЦЬ НАЙСВЯЦЕЙШАГА ЦЕЛА І КРЫВІ ХРЫСТА Абавязковае свята. Святыя Імша а 7.00, 12.00 і 19.00.
Ва ўрачыстасць Спаслання Духа Святога дзеці Эўхарыстычнага Руху Маладых разам з бацькамі сабраліся на Святой Імшы а 10.30 у нашай каплічцы, каб супольна памаліцца і падзякаваць Богу за пражыты фармацыйны год.
Чарговы сужэнскі баль, арганізаваны нашай парафіяй, адбыўся ў Хрысціянскім цэнтры імя св. Уршулі 27 мая 2023 года. Але для мяне і майго сужонка гэта быў першы баль у жыцці. Гэта была нейкая казка, якую Бог падараваў 16 парам на паўдня. Таксама з намі быў наш пробашч кс. Алег Шпець, які распачаў гэты баль малітвай і патлумачыў, што і танцам мы можам праслаўляць Бога.
21 мая з нагоды заканчэння чарговага фармацыйнага года парафіяльны хор «Effata» разам з ксяндзом Алегам Шпецем правёў дзень у Іўі. Харысты гулялі па вуліцах славутага беларускага гарадка (з якога, дарэчы, паходзяць двое святароў з нашай парафіі: апроч ксяндза Алега, тут мае радзіму ксёндз Андрэй Лысы) і завіталі з экскурсіяй у Іўеўскую мячэць, дзе даведаліся аб гісторыі і любаваліся інтэр'ерам мусульманскай святыні.
Шчыра дзякуем вам за супольную малітву, за прыбіранне капліцы, за складзеныя ахвяраванні, за ахвяраванні на будову касцёла і за ўсялякую аказаную дапамогу. Няхай Добры Бог узнагародзіць вашую шчодрасць і дабрыню. На гэтым тыдні ў літургіі адзначаем: 29 мая (панядзелак) — Успамін НПМ Маці Касцёла 31 мая (серада) — Свята Адведзінаў НПМ Святая Імша а 7.00, 12.00 і 19.00 . 1 чэрвеня (чацвер) — Свята Езуса Хрыста, Найвышэйшага і Вечнага Святара 3 чэрвеня (субота) — Успамін св. Караля Луангі і паплечнікаў, мучанікаў Нарадзіўся ў 1865 г. у Буліму (Уганда). Быў кіраўніком груп маладых пажоў пры двары мясцовага караля. У 1885 г. прыняў хрост і навярнуў у хрысціянскую веру шмат іншых пажоў. Праз пэўны час у краіне распачаўся пераслед хрысціянаў, у выніку якога Караль быў забіты. Яго і яшчэ 31 хрысціяніна спалілі ў Намугонга. Пій ХІ абвясціў святога Караля Луангу апекуном афрыканскай моладзі.
Раніцай 21 мая 2013 года ў Познаньскай Архікатэдры пачалася Святая Імша, падчас якой дыякан Уладзімір Марушэўскі SChr ва ўзросце 24 гадоў атрымаў з рук біскупа Гжэгажа Бальцэрэка сакрамэнт пасвячэння. З той хвіліны малады новапрэзбітар пачаў сваё служэнне на ніве Пана.
У нядзелю 21 мая ў нашай парафіі адзначалася шмат добрых падзей, якія выклікалі радасць і пачуццё падзякі Богу і людзям. Сярод іх былі 10-ая гадавіна святарскіх пасвячэнняў ксяндза Уладзіміра, выезд нашага парафіяльнага хора «Эффата» ў Іўе, а таксама гадавіна Першай Святой Камуніі і заканчэнне катэхетычнага года.
20 мая дзеці, якія ў мінулую нядзелю прынялі Першую Святую Камунію, завяршылі Белы Тыдзень выездам у Жодзіна ў санктуарый Маці Божай Фацімскай. Разам з імі былі бацькі, а таксама іх суправаджалі нашыя святары хрыстусоўцы — ксёндз Уладзімір Марушэўскі SChr і ксёндз Андрэй Лысы SChr , а таксама сёстры назарэтанкі — сястра Марыанна CSFN і сястра Назарыя CSFN .
Шчыра дзякуем вам за супольную малітву, за прыбіранне капліцы, за складзеныя ахвяраванні, за ахвяраванні на будову касцёла і за ўсялякую аказаную дапамогу. Няхай Добры Бог узнагародзіць вашую шчодрасць і дабрыню.
Дарагія сябры! Просім падтрымаць будаўніцтва нашага касцёла і дзейнасць парафіі. Шчыра дзякуем за дапамогу, молімся за ўсіх ахвярадаўцаў.
