Ужо восьмы год у нашай парафіі служаць сёстры з Кангрэгацыі Сясцёр Найсвяцейшай Сям’і з Назарэта. На пачатку новага 2024/2025 навучальнага года ў парафіі прывіталі двух новых сясцёр: с. Юзэфу Канаеву і с. Даніэлю Рагацэвіч.

Дзякуем сястры Марыанне Алешчык CSFN, якая шмат гадоў прысвяціла служэнню ў нашай парафіі (2017-2018, 2020-2024). Развіццё супольнасці школьнай моладзі, сталыя катэхетычныя групы дзяцей, фармацыя сямей, паўстанне Жаночага клуба — усё гэта плёны, якія пажынае наша парафія. Дзякуем сястры Фаўстыне Крывіцкай CSFN, якая была ў нас не так доўга (2023-2024), але актыўна дапамагала ў фармацыі моладзі праз служэнне ў ЭРМе. Дзякуем сястры Назарыі Міклаш CSFN (2021-2023), якая пакарыла сэрцы шматлікіх дзяцей сваёй чуласцю, дабрынёй і цікавымі катэхезамі. Плёнам служэння сястры Назарыі стаў актыўны ўдзел дзяўчынак і дзяўчын у рэкалекцыях, якія арганізуюць сёстры назарэтанкі, і ў супольнасці «Чыстыя сэрцам». Дзякуем сястры Агнешцы Рамашка CSFN (2018-2021) за яе старанні падчас Канікулаў з Богам, у правядзенні катэхезаў дзеткам і за іншыя служэнні. Дзякуем сястры Кляры Волчак CSFN (2017-2020), якая праводзіла Біблійную групку, заўсёды заахвочвала да пагружэння ў Святое Пісанне. Таксама з дапамогай сястры Кляры быў распрацаваны сцэнар незабыўнага спектакля пра сясцёр мучаніц, у якім галоўнымі акторамі сталі нашыя парафіяне.

Дзякуем сёстрам назарэтанкам, якія служылі ў нашай парафіі, за прыклад, за служэнне і за асабісты ўклад у развіццё нашай парафіі. Цешымся і ганарымся, што столькі гадоў вы ёсць у нас!

На цяперашні момант у нашай парафіі служаць сястра Даніэля Рагацэвіч CSFN і сястра Юзэфа Канаева CSFN, якія ўжо ад канца жніўня ўзяліся за актыўнае служэнне: дапамагалі падчас Канікулаў з Богам, узялі адказнасць за ЭРМ, за катэхізацыю дзяцей, моладзі і іншыя справы! Асабліва дзякуй вам, нашыя дарагія сёстры, за малітоўную падтрымку нашай парафіі!

Сярод плёнаў сямігадовага служэння сясцёр у нашай парафіі хочацца вызначыць пакліканне адной з парафіянак — сястры Наталлі Урбановіч CSFN.