Галоўная мэта руху Equipes Notre-Dame — дапамога хрысціянскім сем’ям найбольш поўна перажываць сакрамэнт шлюбу. Cем’і руху Equipes Notre-Dame імкнуцца жыць з Хрыстом, прызнаюць Яго Пастырам і Панам свайго сужэнства, а Яго Евангелле прымаюць за канстытуцыю сваёй сям’і.

Мы жывём у эпоху кантрастаў. З аднаго боку, у свеце трыумфуюць разводы, здрады, свабодныя саюзы; з іншага — штораз часцей ствараюцца сужэнствы, якія імкнуцца да сапраўднага хрысціянскага жыцця. Некалькі такіх сужэнстваў разам з кс. Анры Кафарэлем у 1939 годзе заснавалі Суполкі Маці Божай. На дадзены момант рух дзейнічае ў 93 краінах свету і налічвае каля 140 000 удзельнікаў.

Рух END паказвае сужонкам глыбокі сэнс сакрамэнту шлюбу, адкрывае перад імі каштоўнасці і багацце малых хрысціянскіх супольнасцяў, а таксама паказвае ім шляхі сузірання Бога ў іх жыцці.

Суполкі END — гэта не дыскусійныя групы, а трывалыя арганізмы, якія складаюцца з людзей.

Сужэнствы, якія ствараюць суполкі END:

• імкнуцца выконваць абяцанні, дадзеныя падчас хросту;
• хочуць жыць для Хрыста, з Хрыстом і праз Хрыста;
• аддаюцца Яму безумоўна;
• прагнуць служыць Яму безагаворачна;
• прызнаюць Яго Пастырам і Панам свайго сужэнства;
• Яго Евангелле прымаюць за канстытуцыю сваёй сям’і;
• хочуць, каб іх любоў, асвечаная сакрамэнтам сужэнства, была:
  • ушанаваннем Бога;
  • выразным сведчаннем перад людзьмі таго, што Хрыстус захаваў іх любоў;
  • выпраўленнем грахоў чалавецтва супраць сужэнства;
• прагнуць паўсюль быць місіянерамі Хрыста;
• адданыя Касцёлу, імкнуцца заўсёды адгукацца на просьбы свайго біскупа і сваіх святароў;
• імкнуцца быць кампетэнтнымі ў сваёй прафесійнай сферы;
• кожным сваім учынкам хочуць супрацоўнічаць з воляю Бога і служыць іншым людзям.

Першая суполка ў нашай парафіі пачала сваю фармацыю ў 2014 годзе, як заступніка сужэнствы выбралі сабе св. Яна Паўла ІІ. Пазней паўсталі яшчэ дзве суполкі — св. Брыгіты і бл. Сясцёр Мучаніц з Навагрудка. У чэрвені 2022 года Карту Руху прынялі новыя сужэнствы, і паўсталі дзве новыя суполкі — Маці Божай Будслаўскай і свв. Людвіга і Зэлі Мартэн.

7 верасня 2019 года беларускія сем’і адзначалі юбілей 15-годдзя існавання Руху ў Беларусі. За гэты час Рух развіўся настолькі, што падчас урачыстасці адбылося заснаванне Рэгіёну Беларусь, у складзе якога выдзелены два сектары: Паўночны і Паўднёвы. Гэта азначае, што міжнародны Рух END прызнаў Беларусь як самастойную адзінку.

Каб далучыцца да руху, звяртайцеся да духоўных дарадчыкаў — кс. Алега Шпеця SChr, кс. Уладзіміра Марушэўскага SChr або кс. Андрэя Лысага SChr.

Больш інфармацыі можна атрымаць тут: end.of.by.